قبل ما اكتب هذا البوست استرجعني موقف حصلي من مده...كنت مره في الباص في طريقي الى البيت ... وكنت لبسه معطفي الصوفي السميك وقبعتي المفضله, شكلي ولا شيرلوك هولمز.. قعدت في نهايه الباص الدنيا زحمه ولو لقيت لك مكان اقعد على طول بدون تفكير. وفجأه سمعت واحد بيقول للتاني بالعربي تعال هنا في مكان !!!وقعدوا بالكراسي اللي بجانبي..شكلهم اعمارهم في اوخر العشرينات ...واخدوا يتكلموا عن الغربه وكيف اكل امهم واحشهم( باين عندهم مشكله في الطبخ...هههه) وانه الغربه كربه. انا عملت نفسي مش سامعه او فهمه حاجه.... مع انه كنت حاسه فيهم قوي قوي. وفجأة لقيت واحد فيهم بيقول للتاني: البنت ديه شكلها محترم خالص..عارف الواحده المحترمه بيبان عليها.انا قلت ياربي هما بيتكلموا على مين!!! وفجأة كلاكيت تاني مره شوفت صاحبه بينظر اتجاهي وقال: اي والله شكلها بنت ناس.انا لم ابين ليهم اي ردت فعل بس ارتبكت وخفت...ونزلوا بعد شويه...كافين خيرهم شرهم...الحمدلله.. بس انا انبسطت كثير على شهادتهم ...اسعدني انهم استشفوا ذالك دون معرفتهم بي...ياسلام ياسوسو والله عرفتي تربي...والكل يشهد باخلاق بنتك
مش عرفه ليه في الغربه بحس انه كل الناس اللـــــي هم من الوطن الكبير هم كأهلي وانه المفروض يكون قلبنا على بعض...وانه كلنا اخوه والغربه لازم تخلينا نخاف على بعض ..ما ننهش لحم بعض. بس كان غايب علي ان هم ناس عاديين..فيهم الطيب وفيهم الحرامي فيهم ابن الناس وفيهم الواطي.بس الحكايه بتخد وقت على بال متعرفهم وهذا ينطبق على علاء الدين..هو اسمه مش كده بس شكله كده. اتعرفت عليه في حفله كانت عملها صديقه لي بمناسبة حصول زوجها على الماجستير...المهم اتكلمنا ...وعجبني انه انسان هادي وسهل الحديث معه. متعلم يعمل بوظيفه محترمه. الرجل المناسب في الوقت المناسب وتكلمنا طيلة الحفله...وروحت البيت وانا بغني: و الكلمة أنا عايـش بيهـا وحـأدوب كل الشوق فيها راح اقولها وأعيدها وأغنيــــها
وقلت لصحبتي وقالت لي هو انا معرفوش قوي بس هو كان زميل زوجي في دراسة الماجستير...بس يابنت ياعرب شكله كويس و ينفع زوج...ويلى بقى اتزوجي وريحينا منك
وبعد مده اتقبلنا انا وعلاء الدين وبدون المصباح في كوفي شوب واتكلمنا وقلت لنفسي يا حلاوه يا اولاد..الدنيا اخيراً ضحكت لي , اتكلمنا عن اهله واهلي شغله وشغلي..الغربه...و متاعبها!!!!...بس انا حسيت , حسيت ودي اول مره اعيش واحس...لا بجد حسيت انه مبسوط هنا..بلا غربه بلا كلام انشاء....قلت عادي يجوز برضه الاختلاف في وجهات النظر
وبعد عدة مقابلات لينا... اتخنقت ..لقيته دائما الاستغراب من ردودي..يعني لما اقول انه انا بنت محافظه وانه انا هنا لوحدي مش معناه انه امشي على هواي...وانه الله هو رقيبي وانه شرف البنت زيي عود الكبريت ...لقيته بيقول: بس انت مش متحجبه ليه التدين ده!!! مره تانيه سمعته بيقول انا مع حرية المرأه خليها تروح وتجي وتنبسط زيها زي الشاب " يعني تصيع زيه" ...واخيراً اللي خلاني اقول الراجل ده مش اهبل بس مستهبل ...يوم ما قال: انا عازم اصحابي من الجامعه عندي في الشقه...ياريت تجي
ايه ده ايه ده ...فيلم النظاره السوداء...ودى عملي فيها احمد مظهر...وانا ناديه لطفي وهروح ليه الشقه...انا لحد هنا واستوب على جنب ياسطى...قلت ليه كلام...مع اني من خريجت مدارس وجامعات خاصه.. يعني من نوعية ياي مامي... بس وديني عرفته مقامه... بلا قرف بقالي شهر برد على كل افكاره المنيله بنيله بالحنكه والعقل..بس الظاهر نوعية علاء الدين ما بتعرف تميز...ياعم...اتنين شباب في الباص خلال عشرة دقائق عرفوا معدني...وانت عمرك مش هتعرف
.صحيح ماما قلتها حكمه : اللي مابيعرفك مابيثمنك
